المسئول
بالله عليك يا مسئول -- لو كنت مواطن عادى وأسرة وعيال بتعول -- كنت حتبقى زينا وتفطر وتتعشى طعمية وفول ؟وتركب اتوبيس الهيئة وتروح شغلك وقميصك من العرق مبلول ؟ وتوقف فى طابور العيش ساعة واتنين وتتعارك مع العاقل والمخبول ومديرك يتحكم فيك -- وخصومات وجزاءات شيىء مش معقول -- ويفوت عليك الشهر ومش عارف تجيب كيلو لحمة أو حتى شوية فاكهة -- والولاد عايزة دروس -- والدروس محتاجة فلوس والفلوس يدوب عالقد -- وانت قاعد لا حول ولا قوة ايد عالراس وايد عالخد -- وأم الولاد تعبانة ولازم تروح الدكتور -- والدكتور طلب اشعة وفحوصات وكتبلها علاج بشيىء وشويات --وعملت قرار علاج الدولة -- اى والله تشكر الدولة -- دفعتلك
200 جنيه -- طب والباقى حتجيبه منين --طب الكهربا والايجار -- ويوم سباك ويوم نجار -- ماالحنفية بايظة والباب كاشف الجار--وصدق وامن بالله انا بقالى 3شهور ما دقت طعم الخضار--
ولا زرت اخويا ولا ابن عمى ولا حتى جارنا اللى ساكن جنبى فى الدار -جاوبنى يا مسئول --جاوبنى اعمل معروف -- انا سامعك -- اتكلم -- اتفضل قول --أكيد طبعا مكسوف -- ماهو الكرسى لمعك وعمل منك قمر فوق فى السما -- بس ياخسارة قمر فى يوم خسوف
تحياتى
خالد الجندى-
aaa